ბლოგი

Sophie Nikoladze's picture

ჩემპიონები გამოვლინდნენ!

ირაკლი ბერაძის დამაჯერებელი პირველობით დასრულდა საქართველოს ჩემპიონატი 20-წლამდე ჭაბუკთა შორის.

გამარჯვებულმა 9-დან 7 პარტია მოიგო და მხოლოდ ორ შეხვედრაში დაუზავდა მეტოქეებს. აღსანიშნავია, რომ ბერაძემ უკვე მეთერთმეტედ (!) მოიპოვა ქვეყნის ჩემპიონის ტიტული სხვადასხვა ასაკობრივ კატეგორიაში.

გამარჯვებულს 1.5 ქულით ჩამორჩნენ და საპრიზო ადგილები გაინაწილეს: ალექსანდრე ებრალიძემ და ნიკა ღვამბერიამ.

გოგონათა შორის ჩემპიონატის დასაწყისში უპირობო ფავორიტად ევროპის ჩემპიონი ნინო ხომერიკი მოიაზრებოდა, თუმცა, მარიამ ჭოლაძემ მე-4 ტურში შესძლო უშუალო კონკურენტის დამარცხება და დარჩენილ ტურებში უშეღავათო ბრძოლით ჩემპიონის წოდებაც დაისაკუთრა.

ჭოლაძემ 9-დან 7.5 ქულა დააგროვა და პირველ ადგილზე ერთპიროვნულად გავიდა. ნახევარი ქულით ნაკლები დააგროვა ნინო ხომერიკმა, ხოლო მესამე ადგილზე 6.5 ქულით ნინო ჯალაღონია გავიდა.

ჩემპიონატი შვეიცარული სისტემით 9 ტურად ჩატარდა და გამარჯვებულმა მოჭადრაკეებმა აგვისტოში, ინდოეთში დაგეგმილ თანატოლთა მსოფლიოს ჩემპიონატზე თამაშის უფლება მოიპოვეს.

შეჯიბრში დაწესებული იყო საპრიზო ფონდიც, რომელიც სამეულში გასულ მონაწილეებზე შემდეგნაირად გადანაწილდა: I ადგილი – 500 ლარი, II ადგილი – 400 ლარი, III ადგილი – 200 ლარი.

  • სათაური: ჩემპიონები გამოვლინდნენ!
  • ავტორი:
  • თარიღი: 10-03-2016 8:12 PM
  • Tags:
Top