ბლოგი

Sophie Nikoladze's picture

წარმატებული დღე!

ბათუმის სპორტის სასახლეში გრძელდება 43-ე საჭადრაკო ოლიმპიადა. 25 სექტემბერს, მეორე ტურის პარტიები გათამაშდა და ისე მოხდა რომ საქართველოს ქალთა და ვაჟთა ნაკრებიც ნორვეგიელებს დაუპირისპირდა. მწვრთნელთა გადაწყვეტილებით ჩვენმა გუნდებმა ლიდერების, პირველ დაფაზე მოთამაშე მოჭადრაკეების - ნანა ძაგნიძის და ბაადურ ჯობავას გარეშე ითამაშეს. მოთამაშეების დასვენება და როტაციის პრინციპით მოქმედება, ოლიმპიადაზე ჩვეულებრივი ამბავია. მითუმეტეს ახლა, როცა შეჯიბრი ახალი დაწყებულია და მთავარი ბრძოლები ჯერ წინ არის. ნაკრების მწვრთნელები ლიდერებს დასვენების საშუალებას აძლევენ. ქალთა ნაკრების პირველ დაფაძე ადგილი ლელა ჯავახიშვილმა დაიკავა, რომელმაც გუშინ თავისი პარტია დათმო და დღეს კიდევ უფრო მეტი მოტივაციით ითამაშა. ჯავახიშვილმა, ისევე როგორც სხვა მოჭადრაკეებმა თავისი პარტიები მოიგეს და საქართველოს ნაკრებმა დამაჯერებელი გამარჯვება ჩაიწერა  - 4:0.

ვაჟთა პირველ დაფაზე მიხეილ მჭედლიშვილმა გადაინაცვლა, ხოლო მისი ადგილი მეორე დაფაზე ბულგარელმა ივან ჩეპარინოვმა დაიკავა, რომელიც მწვრთნელებმა საწყის ტურში დაასვენეს. სამწუხაროდ, მჭედლიშვილმა თავისი პარტია დათმო. ჩეპარინოვმა გამარჯვებით ანგარიში გაათანაბრა. მეოთხე დაფაზე ჯოჯუამ ყაიმი ითამაშა და შეხვედრის ბედი ლევან ფანცულაიას და სებასტიან-იოჰან კრისტიანსენის შეხვედრაში გაირკვა - მოჭადრაკეები ყაიმზე შეთანხმდნენ და საბოლოდ 2:2.

ჩვენი სხვა ნაკრებებიდან განსაკუთრებით საინტერესო ვაჟთა მესამე გუნდის აშშ-სთან დაპირისპირება გახლდათ, რომელიც ტურნირის პირველი ნომერი და ჩემპიონობის ერთ-ერთი უმთავრესი ფავორიტია. აშშ-ს პირველ დაფაზე მსოფლიოს რეიტინგის მეორე ნომერი და ამ ოლიმპიადაზე პირველ ნომრად განთესილი ფაბიანო კარუანა ჰყავს, რომელიც 9 ნოემბრიდან, ლონდონში მსოფლიოს პირველ ნომერთან ნორვეგიელ მაგნუს კარლსენთან ბრძოლაში ჩაებმევა და მსოფლიოს ჩემპიონის ვინაობას გამოავლენს. ასეთ ძლიერ ნაკრებს დაუპირისპირდა საქართველოს მესამე ნაკრები, რომელიც 20-წლამდელთა ნაკრების მოჭადრაკეებით არის დაკომპლექტებული. ჩვენმა გუნდმა შეხვერა 1.5:2.5 დათმო, თუმცა ახალგაზრდა მოჭადრაკეებმა დიდი გამოცდილება მიიღეს. პირველ დაფაზე ნოე თუთისანმა ყაიმი ითამაშა ფაბიანო კარუანასთან, რომელიც გამორიცხული არ არის ნოემბერში მსოფლიოს ჩემპიონი გახდეს.

აღსანიშნავია, რომ ამ შეხვედრის სიმბოლური სხვლა ნონა გაფრინდაშვილმა გააკეთა.  გაიმარჯვა ვაჟთა მეორე ნაკრებმაც დანიასთან 2.5:1.5. ქალთა მეორე გუნდმა კი შვედეთს  3.5:0.5 აჯობა. ცხადია, აღსანიშნავია მესამე ნაკრების ყაიმიც გერმანიის ნაკრებთან  - 2:2.

 

ბათუმი. ახალი სპორტის სასახლე. 23 სექტემბერი - 5 ოქტომბერი. საჭადრაკო ოლიმპიადა
II ტური
ქალები

საქართველოს პირველი ნაკრები - ნორვეგია 4:0
1. ლელა ჯავახიშვილი - ოლგა დოლჟიკოვა 1:0
2. ნინო ბაციაშვილი - ელენ ჰაგესატერი 1:0
2. ბელა ხოტენაშვილი - ბარფ შეილა საჰლი 1:0
4. მერი არაბიძე - მონიკა მაჩლიკი 1:0

საქართველოს მეორე ნაკრები - შვედეთი  3.5:0.5
1. სალომე მელია - ინნა აგრესტი 0.5:0.5
2. ინგა ჭარხალაშვილი - ჯესიკა ბენგსტონი 1:0
3. სოფიო გვეტაძე - ანჟელინა ფრანსონი 1:0
4. მირანდა მიქაძე - მარგარიტა ზარიტოვსკაია 1:0

საქართველოს მესამე ნაკრები - გერმანია  2:2
1
. ნინო ხომერიკი - ელიზაბეტ პაეტზი 1:0
2. მარიამ ჯანიაშვილი - ფილიზ ოსმანოდჟა 0:1
3. ლილე ქორიძე - სარა ჰოლტი 0.5:0.5
4. თამარ ესაძე - იუდიტ ფუქსი 0.5:0.5

ვაჟები
საქართველოს პირველი ნაკრები - ნორვეგია 2:2

1. მიხეილ მჭედლიშვილი - არიან ტარი 0:1
2. ივან ჩეპარინოვი - ოლსენ ოლავ ფროდე ურკედალი 1:0
3. ლევან ფანცულაია - სებასტიან-იოჰან კრისტიანსენი 0.5:0.5
4. დავით ჯოჯუა - იოჰან სალომონი 0.5:0.5

საქართველოს მეორე ნაკრები - დანია  2.5:1.5
1. ლუკა პაიჭაძე - ვანგ იაკობ გლადი 0.5:0.5
2. დავით მაღალაშვილი - სიმონ იენსენ-ბეიკერი 0.5:0.5
3. თორნიკე სანიკიძე - მიოლერ ბიორნ ოლშნერი 0.5:0.5
4. გიგა ყუფარაძე - ბუჰლ იონას ბჟერე 1:0

საქართველოს მესამე ნაკრები - აშშ 1.5:2.5
1. ნოე თუთისანი - ფაბიანო კარუანა 0.5:0.5
2. ლუკა ობოლაძე  - ვესლი სო 0:1
3. ნიკოლოზ პეტრიაშვილი - სამუელ შანკლანდი 0.5:0.5
4. ნიკოლოზ კაჭარავა  - რეი რობინსონი 0.5:0.5

ბთუმი 2018-ის მეორე ტურში მსოფლიო რეიტინგის ლიდერი ამერიკის შეერთებული შტატების ვაჟთა ნაკრები, ვინც ოლიმპიადის მოქმედი ჩემპიონი გახლავთ, საქართველოს ვაჟთა მესამე ოთხეულს დაუპირისპირდა.
ამერიკელებმა, გადაუჭარბებლად შეიძლება ითქვას, დიდი ძალისხმევით გაიმარჯვეს - 2,5:1,5, არადა სპეციალისტები ფავორიტებს, საფეხბურთო ტერმინოლოგიას რომ დავესესხოთ, იოლ გასეირნებას უწინასწარმეტყველებდნენ. განსაკუთრებით იმის გათვალისწინებით, რომ ბათუმის ოლიმპიადაზე პირველად ითამაშა ამერიკელთა ლიდერმა ფაბიანო კარუანამ, ვინც მსოფლიო ჩემპიონის ტიტულის პრეტენდენტი გახლავთ.
ამერიკელმა დიდოსტატმა, რომლის რეიტინგი სადღეისოდ ძალიან შთამბეჭდავია - 2827, საერთაშორისო ოსტატის ნოე თუთისანის (2471) წინააღმდეგობა ვერ დაძლია - ყაიმი. ამ დაპირისპირებაში პირველი სიმბოლური სვლა 43-ე მსოფლიო საჭადრაკო ოლიმპიადის კეთილი ნების ელჩმა, მსოფლიოს ხუთგზის ჩემპიონმა ნონა გაფრინდაშვილმა შეასრულა.
თუთისანის მსგავსად, ყაიმით დაასრულეს პარტიები ნიკოლოზ პეტრიაშვილმა (სემუელ შენკლენდთან, 2722) და ნიკოლოზ კაჭარავამ (რეი რობსონთან, 2682). ამერიკელთაგან მხოლოდ უესლი სომ გაიმარჯვა. მეორე დაფაზე დიდოსტატმა, რომლის რეიტინგი ასევე შთამბეჭდავია - 2776, თეთრი ფიგურებით სძლია ლუკა ობოლაძეს.
მარცხი არასდროსაა სასიამოვნო, მაგრამ წაგებიდანაც შეიძლება სარგებლის მიღება. განსაკუთრებით, როცა მეტოქე მსოფლიოს საუკეთესო გუნდია.
ბათუმი 2018-ზე ვაჟთა შორის მეორე ნომრად განთესილმა რუსეთმა (სერგეი კარიაკინი, იან ნეპომნიაშჩი, ნიკიტა ვიტიუგოვი, დმიტრი იაკოვენკო) ირლანდიას (66) სძლია - 3:1, ოლიმპიადის კიდევ ერთმა ფავორიტმა ჩინეთმა კი 3,5:0,5 აჯობა კოლუმბიას.

დღეს ოლიმპიადაზე პირველად ითამაშა ლეგენდარულმა ინდოელმა დიდოსტატმა, ბათუმი 2018-ის კეთილი ნების ელჩმა ვიშვანათან ანანდმა (2771, გუშინ ის ისვენებდა). სწრაფ ჭადრაკში მსოფლიოს მოქმედმა ჩემპიონმა ავსტრიელ მარკუს რაგერს (2686) მოუგო, ოლიმპიადაზე მე-5 ნომრად განთესილმა ინდოეთმა კი 3,5:0,5 სძლია მეტოქეს.
კიდევ ერთმა ფავორიტმა აზერბაიჯანმა (შახრიარ მამედიაროვი, ტეიმურ რაჯაბოვი, არკადი ნაიდიჩი, რაუდ მამედოვი) 3:1 მოუგო იტალიას.
საქართველოს მეორე ნაკრებმა 2,5:1,5 გაიმარჯვა დანიასთან, საქართველოს საუკეთესო ოთხეულმა კი ფრედ 2:2 ითამაშა ნორვეგიასთან: ბაადურ ჯობავას არყოფნაში პირველ დაფაზე გადანაცვლებული მიხეილ მჭედლიშვილი ერიან ტარისთან დამარცხდა, ივან ჩეპარინოვმა (II დაფა) ფროდე ოლავ ოლსენ ურკედალს სძლია, ლევან ფანცულაიამ (იოჰან-სებასტიან ქრისტიანსენთან) და დავით ჯოჯუამ კი (იოჰან სალომონთან) თავისი პარტიები ყაიმით დაასრულეს.
მოულოდნელი შედეგის გარეშე არც ქალთა ტურნირს ჩაუვლია: ფავორიტი რუსეთის მარცხი უზბეკეთთან - 1,5:2,5 - ბათუმი 2018-ის ერთ-ერთ მთავარ მოულოდნელობად უნდა ჩაითვალოს.
რუსეთის ქალთა ოთხეული - ალექსანდრა კოსტენიუკი, ალექსანდრა გორიაჩკინა, ვალენტინა გუნინა, ნატალია პოგონინა - ოლიმპიადის პირველი ნომერია, მეტოქე კი 31-ე ნომრად გახლავთ განთესილი. ამის მიუხედავად ფავორიტებმა პარტია ვერ მოიგეს: კოსტენიუკმა, გორიაჩკინამ და გუნინამ ქულები გაიყვეს, თეთრი ფიგურებით მოთამაშე პოგონინა კი ნოდირა ნადირიანოვასთან ვერაფერს გახდა.
კონკურენტის მარცხით უმალ ისარგებლეს ქალთა მეორე ნომერმა უკრაინამ (თურქმენეთთან 2,5:1,5) და მესამე ნომრად განთესილმა ჩინეთმა. აზიელებმა 3:1 მოუგეს კოლუმბიელებს.

საქართველოს ქალთა სამმა ნაკრებმა კი ამჯერად ყველა მატჩის მოგება ვერ მოახერხა: პირველმა ოთხეულმა შთამბეჭდავად, 4:0 სძლია ნორვეგიას; მეორე გუნდმა სკანდინავიის მეორე წარმომადგენელი შვედეთი დაამარცხა - 3,5:0,5, მესამე ნაკრებმა კი, რომელიც ბათუმში 59-ე ნომრადაა განთესილი, რეიტინგში მე-9 ადგილზე მყოფ გერმანიასთან გაიყო ქულები - ფრე 2:2.

2018 წლის მსოფლიო საჭადრაკო ოლიმპიადის საორგანიზაციო კომიტეტი

  • სათაური: წარმატებული დღე!
  • ავტორი:
  • თარიღი: 26-09-2018 2:04 AM
  • Tags:
Top